ബാംഗ്ലൂർ: മലങ്കര യാക്കോബായ സുറിയാനി ഓർത്തഡോക്സ് സഭയിലെ യുവ വൈദികനും ബാംഗ്ലൂർ ക്വീൻസ് റോഡ് സെന്റ് മേരീസ് യാക്കോബായ സുറിയാനി ഓർത്തഡോക്സ് കത്തീഡ്രലിന്റെ വികാരിയുമായ വന്ദ്യ കൗമ റമ്പാച്ചൻ ക്രിസ്ത്യൻ എത്തിക്സിൽ ഡോക്ടറേറ്റ് കരസ്ഥമാക്കി. സെറാമ്പൂർ സർവകലാശാലയുടെ കീഴിലുള്ള ബാംഗ്ലൂരിലെ യുണൈറ്റഡ് തിയോളജിക്കൽ കോളജിൽ നിന്നാണ് അദ്ദേഹം ഡോക്ടറേറ്റ് നേടിയത്.
മൂന്നര വർഷം നീണ്ട ഗവേഷണ പഠനങ്ങൾക്കൊടുവിലാണ് ക്രിസ്ത്യൻ എത്തിക്സ് വിഷയത്തിൽ ഡോക്ടറേറ്റ് നേടിയത്. സുറിയാനി ഭാഷയിലെ പാണ്ഡിത്യവും ശ്രദ്ധേയമായ പ്രഭാഷണശൈലിയും കൊണ്ട് സഭാ-അക്കാദമിക രംഗങ്ങളിൽ സുപരിചിതനായ കൗമ റമ്പാച്ചൻ നിലവിൽ ബാംഗ്ലൂർ ക്വീൻസ് റോഡ് സെന്റ് മേരീസ് കത്തീഡ്രലിന്റെ വികാരിയായി സേവനം അനുഷ്ഠിച്ചുവരികയാണ്.
എഞ്ചിനീയറിങ് രംഗത്ത് മികച്ച ഭാവി മുന്നിലുണ്ടായിരുന്നിട്ടും ആത്മീയ ശുശ്രൂഷയുടെ പാത തിരഞ്ഞെടുത്ത വ്യക്തിയാണ് അദ്ദേഹം. സേലത്തെ വിനായക മിഷൻസ് സർവകലാശാലയിൽ നിന്ന് ഇലക്ട്രോണിക്സ് ആൻഡ് കമ്മ്യൂണിക്കേഷനിൽ ബി.ടെക് ബിരുദം നേടിയ ശേഷം പ്രമുഖ സ്വകാര്യ സ്ഥാപനത്തിലെ ഉയർന്ന ഉദ്യോഗം ഉപേക്ഷിച്ചാണ് എം.എസ്.ഒ.ടി. വൈദിക സെമിനാരിയിൽ ചേർന്നത്. തുടർന്ന് ബാച്ചിലർ ഓഫ് ഡിവിനിറ്റി (ബി.ഡി.) പൂർത്തിയാക്കി.
ശേഷം ബാംഗ്ലൂരിലെ യുണൈറ്റഡ് തിയോളജിക്കൽ കോളജിൽ നിന്ന് മാസ്റ്റർ ഓഫ് തിയോളജി (എം.ടി.എച്ച്.) ബിരുദം നേടിയ അദ്ദേഹം ഗവേഷണ രംഗത്തേക്ക് കടന്നു. ക്രിസ്തീയ ധാർമികതയും സമകാലിക സാമൂഹിക യാഥാർഥ്യങ്ങളും തമ്മിലുള്ള ബന്ധത്തെ ആസ്പദമാക്കിയുള്ള പഠനമാണ് അദ്ദേഹത്തിന്റെ ഡോക്ടറൽ ഗവേഷണത്തിന്റെ മുഖ്യവിഷയം.
എറണാകുളം ജില്ലയിലെ വേങ്ങൂർ മോർ കൗമ യാക്കോബായ സുറിയാനി പള്ളി ഇടവകാംഗമായ പുതുശ്ശേരി ഐസക്–ഷാന്റി ദമ്പതികളുടെ മകനാണ്. ജോയൽ ഐസക് സഹോദരനാണ്.
ഡോക്ടറേറ്റ് നേട്ടത്തിലൂടെ സഭയ്ക്കും അക്കാദമിക മേഖലയ്ക്കും അഭിമാനമായിരിക്കുകയാണ് വന്ദ്യ കൗമ റമ്പാച്ചൻ.
Comments (0)