കൽദായ സഭയുടെ പുതിയ പാത്രിയർക്കീസിന്റെ സ്ഥാനാരോഹണത്തിൽ പങ്കെടുത്ത് പരിശുദ്ധ പാത്രിയർക്കീസ് ബാവാ

മൊസുൾ (ഇറാഖ്): ഇറാഖിലെയും ലോകമെമ്പാടുമുള്ള കൽദായ സഭയുടെയും പുതിയ പാത്രിയർക്കീസായി സ്ഥാനമേറ്റ മാർ ബൗലോസ് മൂന്നാമൻ നോനയുടെ (Mar Boulos III Nona) സ്ഥാനാരോഹണ ശുശ്രൂഷയിൽ പരിശുദ്ധ സുറിയാനി ഓർത്തഡോക്സ് സഭയുടെ പരമാധ്യക്ഷൻ മോറാൻ മോർ ഇഗ്നാത്തിയോസ് അപ്രേം ദ്വിതീയൻ പാത്രിയർക്കീസ് ബാവാ പങ്കെടുത്തു.

2026 മെയ് 29-ന് ഇറാഖിലെ സെന്റ് ജോസഫ് പാത്രിയർക്കൽ കത്തീഡ്രലിൽ (St. Joseph Patriarchal Cathedral) നടന്ന സ്ഥാനാരോഹണ ശുശ്രൂഷയിൽ മധ്യപൂർവദേശത്തെ വിവിധ സഭകളുടെ പാത്രിയർക്കീസുമാരും മെത്രാപ്പോലീത്തമാരും സഭാ നേതാക്കളും സന്നിഹിതരായി. കൽദായ സഭയുടെ പുതിയ പരമാധ്യക്ഷനായി സ്ഥാനമേൽക്കുന്ന മാർ ബൗലോസ് മൂന്നാമൻ നോനയ്ക്ക് വിവിധ സഭാ നേതാക്കൾ ആശംസകൾ നേർന്നു.

പരിശുദ്ധ പാത്രിയർക്കീസ് ബാവായോടൊപ്പം മൊർ മത്താ ആശ്രമ അതിഭദ്രാസനത്തിന്റെ മെത്രാപ്പോലീത്ത അഭിവന്ദ്യ മോർ തിമോത്തെയോസ് മൂസ അൽ-ഷാമാനി, മൊസുൾ–കിർകുക്ക്–കുർദിസ്ഥാൻ, പരിസര പ്രദേശങ്ങൾ എന്നിവിടങ്ങളിലെ മെത്രാപ്പോലീത്ത അഭിവന്ദ്യ മോർ നിക്കോദീമോസ് ദാവൂദ് ഷറഫ്, ജസീറ–യൂഫ്രട്ടീസ് അതിഭദ്രാസനത്തിന്റെ മെത്രാപ്പോലീത്ത അഭിവന്ദ്യ മോർ മൗറീസ് അംസിഹ്, പാത്രിയർക്കൽ സെക്രട്ടറി അഭിവന്ദ്യ മോർ ഔഗീൻ അൽ-ഖൂരി നെമത്ത് എന്നിവരും ചടങ്ങിൽ സംബന്ധിച്ചു.

ക്രൈസ്തവ സഭകൾ തമ്മിലുള്ള ഐക്യത്തിന്റെയും സാഹോദര്യത്തിന്റെയും പ്രതീകമായാണ് ചടങ്ങിൽ വിവിധ പൗരസ്ത്യ സഭകളുടെ പരമാധ്യക്ഷന്മാരുടെയും പ്രതിനിധികളുടെയും സാന്നിധ്യം വിലയിരുത്തപ്പെട്ടത്. മധ്യപൂർവദേശത്തെ ക്രൈസ്തവ സമൂഹത്തിന്റെ ആത്മീയ നേതൃത്വത്തിലും സഭകൾ തമ്മിലുള്ള സഹകരണത്തിലും പുതിയ അധ്യായത്തിന് തുടക്കമാകുന്നതാണ് ഈ സ്ഥാനാരോഹണമെന്ന് സഭാ വൃത്തങ്ങൾ വിലയിരുത്തി.

സ്ഥാനാരോഹണ ചടങ്ങിനുശേഷം പരിശുദ്ധ പാത്രിയർക്കീസ് ബാവാ മാർ ബൗലോസ് മൂന്നാമൻ നോനയ്ക്ക് ആശംസകൾ നേർന്നു. കൽദായ സഭയുടെ ആത്മീയ വളർച്ചയ്ക്കും വിശ്വാസി സമൂഹത്തിന്റെ ഐക്യത്തിനും പുതിയ പാത്രിയർക്കീസിന്റെ നേതൃത്വം അനുഗ്രഹമാകട്ടെയെന്നും അദ്ദേഹം ആശംസിച്ചു.