വി.ഡി. സതീശൻ മന്ത്രിസഭയ്ക്ക് ആശംസകളുമായി മലങ്കര യാക്കോബായ സുറിയാനി സഭ

തിരുവനന്തപുരം: ഇന്ന് അധികാരമേൽക്കുന്ന വി.ഡി. സതീശൻ മന്ത്രിസഭയ്ക്ക് ആശംസകളും പ്രാർത്ഥനകളും നേർന്ന് മലങ്കര യാക്കോബായ സുറിയാനി ഓർത്തഡോക്സ് സഭ. ശ്രേഷ്ഠ കാതോലിക്കായും മലങ്കര മെത്രാപ്പോലീത്തായുമായ ആബൂൻ മോർ ബസേലിയോസ് ജോസഫ് കാതോലിക്ക ബാവയുടെ നേതൃത്വത്തിലുള്ള സഭാ പ്രതിനിധി സംഘം തിരുവനന്തപുരത്തെത്തി നിയുക്ത മുഖ്യമന്ത്രി വി.ഡി. സതീശനെയും നിയുക്ത ആഭ്യന്തര മന്ത്രി രമേശ് ചെന്നിത്തലയെയും സന്ദർശിച്ച് ആശംസകൾ അറിയിച്ചു. കന്റോൺമെന്റ് ഹൗസിൽ എത്തിയ ശ്രേഷ്ഠ ബാവ നിയുക്ത മുഖ്യമന്ത്രി വി.ഡി. സതീശനുമായി കൂടിക്കാഴ്ച നടത്തി. തുടർന്ന് അദ്ദേഹത്തിന്റെ ഔദ്യോഗിക വസതിയിലെത്തി നിയുക്ത ആഭ്യന്തര മന്ത്രി രമേശ് ചെന്നിത്തലയെയും സന്ദർശിച്ചു. പുതിയ മന്ത്രിസഭയ്ക്ക് സഭയുടെ ആശംസകളും പ്രാർത്ഥനകളും ബാവ നേരിട്ട് കൈമാറി. ശ്രേഷ്ഠ ബാവയോടൊപ്പം മീഡിയ സെൽ ചെയർമാനും വൈദീക സെമിനാരി മെത്രാപ്പോലീത്തയുമായ അഭിവന്ദ്യ ഡോ. കുര്യാക്കോസ് മോർ തെയോഫിലോസ് മെത്രാപ്പോലീത്ത, നിരണം ഭദ്രാസനാധിപൻ അഭിവന്ദ്യ ഡോ. ഗീവർഗീസ് മോർ കൂറിലോസ് മെത്രാപ്പോലീത്ത, സഭാ സെക്രട്ടറി ജേക്കബ് സി. മാത്യു, വന്ദ്യ സ്ലീബാ കാട്ടുമങ്ങാട്ട് കോറെപ്പിസ്കോപ്പ എന്നിവർ പങ്കെടുത്തു. സൗഹൃദപരമായ അന്തരീക്ഷത്തിൽ നടന്ന കൂടിക്കാഴ്ചയിൽ സംസ്ഥാനത്തിന്റെ സമകാലിക സാമൂഹിക-രാഷ്ട്രീയ സാഹചര്യങ്ങൾ, മതസൗഹാർദം, സാമൂഹിക ക്ഷേമ പ്രവർത്തനങ്ങൾ, സഭയുമായി ബന്ധപ്പെട്ട വിഷയങ്ങൾ എന്നിവ ചർച്ചയായി. ജനാധിപത്യ മൂല്യങ്ങളും മതേതരത്വവും ഉയർത്തിപ്പിടിച്ച് എല്ലാ ജനവിഭാഗങ്ങളെയും ഉൾക്കൊള്ളുന്ന വികസന കാഴ്ചപ്പാടോടെ പുതിയ സർക്കാർ മുന്നോട്ടുപോകുമെന്ന പ്രതീക്ഷയും സഭാ പ്രതിനിധികൾ പങ്കുവെച്ചു. മുഖ്യമന്ത്രിയായി അധികാരമേൽക്കുന്ന വി.ഡി. സതീശന്റെ സത്യപ്രതിജ്ഞാ ചടങ്ങിലേക്ക് ശ്രേഷ്ഠ കാതോലിക്ക ബാവയ്ക്ക് ഔദ്യോഗിക ക്ഷണം ലഭിച്ചിരുന്നുവെങ്കിലും, മലങ്കര യാക്കോബായ സുറിയാനി ഓർത്തഡോക്സ് സഭയുടെ മുൻ അൽമായ ട്രസ്റ്റിയും മുൻ സഭാ സെക്രട്ടറിയുമായിരുന്ന ബാറീത്തോ കാശീറോ ജോർജ് മാത്യു തെക്കേത്തലയ്ക്കലിന്റെ സംസ്കാര ശുശ്രൂഷയിൽ പങ്കെടുക്കേണ്ട സാഹചര്യം ഉണ്ടായതിനാൽ ചടങ്ങിൽ സംബന്ധിക്കാൻ സാധിച്ചില്ല. എന്നാൽ പുതിയ മുഖ്യമന്ത്രിക്കും മന്ത്രിസഭാംഗങ്ങൾക്കും സഭയുടെ ആശംസകൾ നേരിട്ട് അറിയിക്കുന്നതിനായി ശ്രേഷ്ഠ ബാവ തിരുവനന്തപുരത്തെത്തി കൂടിക്കാഴ്ച നടത്തുകയായിരുന്നു. ജനങ്ങളുടെ പ്രതീക്ഷകൾക്കൊത്ത് ഉയരുന്ന, വികസനവും സാമൂഹ്യനീതിയും ഉറപ്പാക്കുന്ന ഭരണത്തിന് നേതൃത്വം നൽകാൻ പുതിയ മന്ത്രിസഭയ്ക്ക് സാധിക്കട്ടെയെന്ന് ബാവ ആശംസിച്ചു.

Comments (0)

Related Stories