നിയുക്ത മുഖ്യമന്ത്രി വി.ഡി. സതീശന് ആശംസകളുമായി ശ്രേഷ്ഠ ബസേലിയോസ് ജോസഫ് കാതോലിക്ക ബാവ

പുത്തൻകുരിശ്: കേരളത്തിന്റെ നിയുക്ത മുഖ്യമന്ത്രിയായി തിരഞ്ഞെടുക്കപ്പെട്ട വി.ഡി. സതീശന് അഭിനന്ദനങ്ങളും പ്രാർത്ഥനാശംസകളും നേർന്ന് മലങ്കര യാക്കോബായ സുറിയാനി ഓർത്തഡോക്സ് സഭയുടെ ശ്രേഷ്ഠ കാതോലിക്കായും മലങ്കര മെത്രാപ്പോലീത്തായുമായ ആബൂൻ മോർ ബസേലിയോസ് ജോസഫ് കാതോലിക്ക ബാവ. ജനാധിപത്യ സംവിധാനത്തോടുള്ള ജനങ്ങളുടെ വിശ്വാസത്തിന്റെ പ്രതിഫലനമാണ് പുതിയ നേതൃത്വത്തിന് ലഭിച്ച ജനവിധിയെന്ന് ബാവ സന്ദേശത്തിൽ പറഞ്ഞു. കേരള ജനത അർപ്പിച്ച മഹത്തായ വിശ്വാസവും പ്രതീക്ഷകളും നീതിബോധത്തോടെയും ഉത്തരവാദിത്വത്തോടെയും നിറവേറ്റാൻ നിയുക്ത മുഖ്യമന്ത്രിക്ക് സാധിക്കട്ടെയെന്നും അദ്ദേഹം ആശംസിച്ചു. മതനിരപേക്ഷത, സാമൂഹ്യനീതി, ജനക്ഷേമം എന്നീ മൂല്യങ്ങൾ ഉയർത്തിപ്പിടിച്ചുകൊണ്ട് എല്ലാ വിഭാഗം ജനങ്ങളെയും ഒരുപോലെ ചേർത്തുപിടിക്കുന്ന ജനകീയ നേതൃത്വമാണ് സംസ്ഥാനത്തിന് ആവശ്യമെന്ന് ബാവ അഭിപ്രായപ്പെട്ടു. വികസനവും സാമൂഹിക പ്രതിബദ്ധതയും ഒരുപോലെ മുൻനിർത്തിയുള്ള ഭരണത്തിലൂടെ കേരളത്തെ കൂടുതൽ പുരോഗതിയുടെയും സമഗ്ര വളർച്ചയുടെയും പാതയിലേക്ക് നയിക്കാൻ അദ്ദേഹത്തിന് കഴിയട്ടെയെന്നും സന്ദേശത്തിൽ പറഞ്ഞു. ഭരണഘടനാ മൂല്യങ്ങൾ സംരക്ഷിക്കുകയും സമൂഹത്തിലെ പിന്നാക്ക വിഭാഗങ്ങളുടെയും സാധാരണക്കാരുടെയും ക്ഷേമത്തിന് മുൻഗണന നൽകുകയും ചെയ്യുന്ന ഭരണകൂടം സംസ്ഥാനത്തിന്റെ മുന്നേറ്റത്തിന് കരുത്താകുമെന്ന് ബാവ ചൂണ്ടിക്കാട്ടി. സ്നേഹവും സഹിഷ്ണുതയും പരസ്പര ബഹുമാനവും ഉയർത്തിപ്പിടിച്ചുകൊണ്ട് ജനങ്ങളുടെ പ്രതീക്ഷകൾക്കൊത്ത് ഉയരുന്ന ഭരണനേതൃത്വം കാഴ്ചവയ്ക്കാൻ നിയുക്ത മുഖ്യമന്ത്രിക്ക് സർവശക്തനായ ദൈവം അനുഗ്രഹം നൽകട്ടെയെന്നും അദ്ദേഹം പ്രാർത്ഥിച്ചു. നീതിയുടെയും നന്മയുടെയും ജനസേവനത്തിന്റെയും ഉദാത്ത മാതൃകയായി കേരളം കൂടുതൽ ഉയരങ്ങളിലേക്ക് വളരുവാൻ വി.ഡി. സതീശന്റെ നേതൃത്വത്തിന് സാധിക്കട്ടെയെന്നും ശ്രേഷ്ഠ ബസേലിയോസ് ജോസഫ് കാതോലിക്ക ബാവ ആശംസിച്ചു.

Comments (0)

Related Stories