കോതമംഗലം: മുൻ പൊതുമരാമത്ത് മന്ത്രിയും കേരള കോൺഗ്രസ് നേതാവും മലങ്കര യാക്കോബായ സുറിയാനി സഭയുടെ പ്രമുഖ നേതാവുമായ ടി.യു. കുരുവിള (90) അന്തരിച്ചു. വാർധക്യസഹജമായ അസുഖങ്ങളെ തുടർന്ന് ചികിത്സയിലിരിക്കെയായിരുന്നു അന്ത്യം.
കോതമംഗലം മണ്ഡലത്തെ പ്രതിനിധീകരിച്ച് നിരവധി തവണ നിയമസഭയിലെത്തിയ ടി.യു. കുരുവിള, വി.എസ്. അച്യുതാനന്ദൻ മന്ത്രിസഭയിൽ പൊതുമരാമത്ത് വകുപ്പ് മന്ത്രിയായി പ്രവർത്തിച്ചിരുന്നു. രാഷ്ട്രീയ പ്രവർത്തനത്തിനൊപ്പം സാമൂഹിക, വിദ്യാഭ്യാസ, സഹകരണ മേഖലകളിലും സജീവ സാന്നിധ്യമായിരുന്നു.
മലങ്കര യാക്കോബായ സുറിയാനി സഭയുടെ ഭരണരംഗത്ത് ശ്രദ്ധേയ പങ്കുവഹിച്ച അദ്ദേഹം സഭാ സെക്രട്ടറിയായി ദീർഘകാലം സേവനമനുഷ്ഠിച്ചു. സഭയുടെ അവകാശ സംരക്ഷണത്തിനും സ്ഥാപനങ്ങളുടെ വികസനത്തിനും വിശ്വാസി സമൂഹത്തിന്റെ ഐക്യത്തിനുമായി നടത്തിയ പ്രവർത്തനങ്ങൾ ശ്രദ്ധേയമാണ്. സഭ നേരിട്ട നിർണായക ഘട്ടങ്ങളിൽ ശക്തമായ നേതൃത്വമാണ് അദ്ദേഹം കാഴ്ചവച്ചത്.
സഭയ്ക്കും സമൂഹത്തിനും നൽകിയ സേവനങ്ങൾ പരിഗണിച്ച് അന്ത്യോഖ്യാ പാത്രിയർക്കീസ് ബാവായിൽ നിന്ന് "ഷെവലിയാർ", "കമാൻഡർ", "ബാർ ഈത്തോ ശാരിറോ" ഉൾപ്പെടെയുള്ള ബഹുമതികൾ ലഭിച്ചിട്ടുണ്ട്.
കീരംപാറ പഞ്ചായത്ത് പ്രസിഡന്റായും വിവിധ സഹകരണ സ്ഥാപനങ്ങളുടെയും വിദ്യാഭ്യാസ സ്ഥാപനങ്ങളുടെയും ഭാരവാഹിയായും പ്രവർത്തിച്ച ടി.യു. കുരുവിള പൊതുരംഗത്ത് വ്യക്തിമുദ്ര പതിപ്പിച്ച നേതാവായിരുന്നു.
ഭൗതികശരീരം പൊതുദർശനത്തിനായി സ്വദേശത്ത് വയ്ക്കും. സംസ്കാര ശുശ്രൂഷകൾ ചേലാട് സെന്റ് സ്റ്റീഫൻസ് ബെസ്-അനിയ വലിയ പള്ളിയിൽ നടക്കും.
ടി.യു. കുരുവിളയുടെ നിര്യാണത്തിൽ സഭാ, രാഷ്ട്രീയ, സാമൂഹിക രംഗങ്ങളിലെ നിരവധി പ്രമുഖർ അനുശോചനം രേഖപ്പെടുത്തി.
Comments (0)